عسكر عسكر عسكر ليه؟!

أكتب اليوم ويكتب غيري المئات وربما الالاف لتحطيم أسطورة الخط الاحمر.
الموضوع كله سواء كنت مؤيد للمجلس العسكري أو معارض ليه إن من النهاردة مفيش تأليه, مفيش تبجيل, مفيش خطوط حمراء, ارادة الشعب الخط الاحمر للحكام وليس العكس.
المجلس العسكري تحمل مسئولية ادارة البلد سياسيا (وفشل فيها حتى الأن) ومن حق كل مواطن مصري انتقاده أو حتى شتمه.
مصر بقالها زمن تحت حكم العسكر واحنا تعبنا .. عملوا إيه العسكر, إنجازات حكمهم سرطان وفشل كلوي وفقر وجوع وبطالة وفساد وديكتاتورية والاف الشهداء.... الخ

سطوع لصوت الجموع شوف مصر تحت الشمس

آن الآوان ترحلى يا دولة العواجيز

عواجيز شداد مسعورين أكلوا بلدنا أكل

ويشبهوا بعضهم نهم وخسة وشكل

كفاية عسكر, كفاية عواجيز, كفاية تمجيد, كفاية تأليه, كفاية ظلم, كفاية ضحك عالدقون.
الثورة ثورة شعبية مش ثورة بلطجية والشعب يؤمر فـيطاع ايا كان قائد البلد ..

الشعب عايز ولاده المدنيين يتحكموا محاكمات مدنية مش محاكمات محاكمات عسكرية.
الشعب مش عايز ولاده يضربوا ويتهانو قدام سفارة العدو الصهيوني.
الشعب لما يعوز حاجة تتعمل من غير جدال. حاكم البلد ايا كان شغال عند الشعب.

المجلس العسكري مش فوق النقد, صحيح احنا كامل احترامنا للجيش المصري بس للجيش مش للمجلس العسكري بصفته السياسية الحالية وهي "مدير شئون البلاد"

أنا مش هتكلم على الشبهات اللي بتحوم حوالين المجلس العسكري اللي كل الناس عرفاها لكن حبيت اوضح إن بس مبدأ المحاسبة والإنتقاد موجود وإن احنا انتزعناه بدم شهداء ضافرهم بكل اعضاء المجلس العسكري ودهمهم مش هيروح هدر.
عشان كده هننزل يوم 27 الثوره لازم تكمل

تحديث:

على فكرة التدوينة اتنشرت هنا: البوابة اونلاين : يوم التدوين ضد العسكر

^__^

قضية انسانية: ايتام يحتاجون مساعدتكم.

دار الولاء والوفاء للايتام المعاقين بمدينة نصر قد نفذت منه اموال التبرعات منذ أيام الثورة.
رجال الاعمال الذين كانوا يقومون بالتبرع بصفة دورية للدار قد توقفوا عن التبرع.
وصلني ان المركز قد استهلك كل مافيه من غذاء ودواء وإن الايتام لم يأكلوا منذ عدة أيام.
يوجد ايضا طفلين بحاجة إلى عمليات جراحية وهم يواجهون خطر الموت كل ساعة.

للمساعدة يمكنك الإتصال على رقم مديرة الدار:
مدام/ جيهان : ت: 0105839947
عنوان الدار: ‎38 شارع عبد الله ابن الطاهر متفرع من أبو داود الظاهرى - مدينة نصر - القاهرة

فكرة بسيطة لعودة الأمن ودوران "عجلة الإنتاج" اللي قارفننا بيها

أولا اعتذر إني بقالي فترة مكتبتش بس كنت مشغول جدا وظروف الحياه والكلام اللي كلكم فاهمينه.
ندخل في الموضوع..
الفترة اللي فات الجيش ومجلس الوزراء قرفنا بـ"عجلة الإنتاج" وإن "مصر على وشك الإفلاس" وإن الوضع الحالي زي الزفت وإن احنا داخلين على أيام سودة..ورغم إن خبراء اقتصاد كتير جدا نفوا الكلام ده وقالوا كذا حل للموضوع الا إن الإعلام مصمم إن احنا في محنة..

ايا كانت الاسباب اللي ممكن تفكير البعض وأنا منهم يوصلها واللي منها إن الجيش عايز يستمر في الحكم أو بمعنى ادق إن الحكم ميخرجش برة المؤسسة العسكرية وده يتناسب مع تصريحات الجيش كلها بداية من تصريحهم انهم كانوا "هيقفوا قدام التوريث" واللي ممكن يتفسر بنفس المنطق إن جيمي ببساطة ليس لديه خلفية عسكرية, المهم مش ده برضو موضوعنا..

الفكرة كلها ببساطة (وأنا مش خبير اقتصادي على فكرة) إن اللي مضيع الإقتصاد حاليا وموقف ال"عجلة" إن مفيش أمن, وواضح إن موضوع الأمن ووراه الازمات في السولار وبنزين 80 وكل الكلام ده لوي دراع, أنا مبحبش حد يلوي دراعي..غير إن طبعا ضعف الأمن على الطرق يؤدي إلى صعوبة نقل البضائع اللي بالتالي بتأثر على الإقتصاد.. أنا كلامي مش عن المنتفعين من النظام السابق اللي قافلين مصانعهم بمزاجهم كرت إرهاب ولا وزارة الداخلية اللي المفروض تتحجب وتقعد في البيت تفصل ملابس "داخلية" أهو على الاقل نستفيد منها بحاجة.

المهم على نص شهر يونيو (6) طلبة ثانوية عامة والجامعة معظمهم هيكونوا خلصوا امتحانات, أنا شايف إن احنا ندعي الناس ديه تعمل لجان شعبية زي أيام الثورة للحفاظ على الأمن للاسباب التالية:
1- الناس ديه مبتشتغلش في حتة مثلا فمش هتوقف "عجلة إنتاج" حد.
2- هما كده كده فاضيين ومورهمش مذاكرة ولا وراهم حاجة.
3- هما كده كده بيقضوا الاجازة كلها في الشارع واللي مش بيقضيها في الشارع عشان أهله بيقفشوا مثلا أهِه فرصة يتلكك ويقول إن مصر محتاجاه.

مفيش اتنين يختلفوا على إن وقت الثورة واللجان الشعبية لما كنا بنحمي نفسنا بنفسنا كان أكتر وقت الناس حست فيه بالامان. وطبعا مع عودة الأمن الإقتصاد هيرجع يتعافي أو على الاقل هنفهم مين رجال الاعمال اللي بيتلككوا ومين اللي فعلا عندهم مشكلة امنية فعلا.

ديه الفكرة حاولت اشرحها على قد ماقدرت وأنا عن نفسي بحاول اساعد مصر اقتصاديا على قد مااقدر بس مش لازم اسيح واقول أنا عملت وسويت..
فوتكم بعافية .. لو حد عايز يناقش الفكرة يسيب كومينت :)