مشاكل بالجملة في تسجيل المصريين بالخارج

ابدأ كلامي بالدعوة على اللي صمم أو اشترك في تصميم الجزء الفاشل بكل المقاييس للمصريين بالخارج في موقع الحياة العليا للإنتخابات.
الموضوع في مشاكل كتير جدا اذكر منها القليل لأوضح مدي المعاناه التي يواجهها المصريين في الخارج أثناء التسجيل للتصويت ولأبين لكم سبب "ضعف الإقبال" كما يقولون

أولا: الموضوع معقد جدا على المصريين الغلابة أو الغير محترفين في استخدام الإنترنت والكمبيوتر. عامل غلبان في دولة خليجية قالي حاولت يا باشمهندس 4 مرات وبعدين قلت "يلعن ********* تيييت" وقفلت.

ثانيا: لا يوجد دعاية (مش لا يوجد دعاية كافية لأ ده لا يوجد دعاية أصلا) للموضوع أو لطريقة التسجيل أو الموقع على أي قناه تلفزيونية أو اذاعة أو جريدة في أي دولة, في ناس متعرفش أصلا حتى اليوم (فاضل 3 أيام على غلق التسجيل) أو للتسجيل في السفارة حتي مش الموقع بس.

ثالثا: موضوع الCaptcha Code أو الكلمتين الإنجليزي اللي المفروض تكتبهم عشان يمنع اتمتة التسجيل مليان مشاكل وكذا مرة بيطلب منك تدخله تاني حتي ولو كان صحيح في بعد الحالات.

رابعا: في سادس يوم تم تحويل خانات بيانات جواز السفر من اجبارية إلى اختيارية بدون أي تنويه في الموقع.

خامسا: الموقع فضل واقع لاكتر من 20 ساعة من سادس يوم مساءا وحتي اليوم السابع صباحا وحتي الآن لحظة كتابة هذه الكلمات الموقع فيه خطأ فني "Infinite loop detected in JError" ده غير تحويل الصفحة الخاصة بالتسجيل من Unsecure Connection إلى Secure Connection [HTTPS] بعد اليوم الخامس يعني غير المشاكل اللي سببها الموضوع ده لناس كتير في أكتر من 100,000 مصري سجل على الموقع بدون أي اجراءات حماية للمعلومات, معناه امكانية قرصنة البيانات ديه بسهولة لأي هاكر مبتدئ.

سادسا: صفحة الإحصائيات ديه قصة تانية, في الاول مكنتش موجودة أصلا ثم تم وضع تصميم فقير )خريطة مثل جوجل مابس وعند ادع الماوس فوق الدولة يظهر لك عدد المسجلين فيها) لدرجة إن دول مثل قطر والبحرين كان لا يمكن تحديد مكانهم بالعين المجردة. ثم في اليوم السابع قرروا اعادة تصميمها ووضعوا خريطة من جوجل مابس فعلا لإمكانية تكبير الخريطة فيها. والمفاجأة تم مسح كل البيانات من عليها ولم تعد الارقام موجودة .. جم يكحلوها عموها يعني.

سابعا: صفحة الشكاوي والإستفسارت مازال رقم الجواز فيها اجباري مع انه اصبح غير اجباري للتسجيل ده غير إن لا يتم الرد على الشكاوي من الاصل. (عن تجربه مردوش من 4 أيام)

ثامنا: بعض المسجلين لا يعطيهم الموقع الكود الخاص بنجاح التسجيل ثم عند محاولة التسجيل مرة ثانيا يعطي الموقع رسالة بأنه "تم التسجيل من قبل" ولا طريقة للحصول على الكود ثانية في أي مكان. (يعني حتي لو اداك الكود وضاع منك بح كده)

تاسعا: حتي الآن لا يوجد إجابة واضحة لأسئلة مثل (ديه اسئلة ناس فعلا اتسألت على تويتر) :
1- طب لو انا سجلت وانتخبت في مجلس الشعب , وفي انتخابات الرئاسه كنت في مصر اعمل ايه ؟؟
2- هننتخب إزاي اصلا؟ في السفارة ولا عالنت؟
3- حد يعرف اللى هايبقى بره مصر ساعة الانتخابات بفيزا سياحة مش اقامة له حق الانتخاب من الخارج ولا لأ ؟؟؟؟
والكثير من الاسئلة الأخري تظل بدون اجابه واضحة.

مع كل اللي قلته ده ده مجرد جزء من المشاكل ديه, وفي أكتر بكتير, متستغربوش من قلة الاعداد.
وأنا وناس تانية كتير بدا يتسرب لينا الشك نتيجة الإستهتار والتباطؤ والمشاكل ديه كلها إن الارقام المعلنة حقيقية فعلا ولا أي كلام عشان يتحججوا بضعف الإقبال لالغاء الموضوع "لانها مكلفة والعدد مش مستاهل"

عسكر عسكر عسكر ليه؟!

أكتب اليوم ويكتب غيري المئات وربما الالاف لتحطيم أسطورة الخط الاحمر.
الموضوع كله سواء كنت مؤيد للمجلس العسكري أو معارض ليه إن من النهاردة مفيش تأليه, مفيش تبجيل, مفيش خطوط حمراء, ارادة الشعب الخط الاحمر للحكام وليس العكس.
المجلس العسكري تحمل مسئولية ادارة البلد سياسيا (وفشل فيها حتى الأن) ومن حق كل مواطن مصري انتقاده أو حتى شتمه.
مصر بقالها زمن تحت حكم العسكر واحنا تعبنا .. عملوا إيه العسكر, إنجازات حكمهم سرطان وفشل كلوي وفقر وجوع وبطالة وفساد وديكتاتورية والاف الشهداء.... الخ

سطوع لصوت الجموع شوف مصر تحت الشمس

آن الآوان ترحلى يا دولة العواجيز

عواجيز شداد مسعورين أكلوا بلدنا أكل

ويشبهوا بعضهم نهم وخسة وشكل

كفاية عسكر, كفاية عواجيز, كفاية تمجيد, كفاية تأليه, كفاية ظلم, كفاية ضحك عالدقون.
الثورة ثورة شعبية مش ثورة بلطجية والشعب يؤمر فـيطاع ايا كان قائد البلد ..

الشعب عايز ولاده المدنيين يتحكموا محاكمات مدنية مش محاكمات محاكمات عسكرية.
الشعب مش عايز ولاده يضربوا ويتهانو قدام سفارة العدو الصهيوني.
الشعب لما يعوز حاجة تتعمل من غير جدال. حاكم البلد ايا كان شغال عند الشعب.

المجلس العسكري مش فوق النقد, صحيح احنا كامل احترامنا للجيش المصري بس للجيش مش للمجلس العسكري بصفته السياسية الحالية وهي "مدير شئون البلاد"

أنا مش هتكلم على الشبهات اللي بتحوم حوالين المجلس العسكري اللي كل الناس عرفاها لكن حبيت اوضح إن بس مبدأ المحاسبة والإنتقاد موجود وإن احنا انتزعناه بدم شهداء ضافرهم بكل اعضاء المجلس العسكري ودهمهم مش هيروح هدر.
عشان كده هننزل يوم 27 الثوره لازم تكمل

تحديث:

على فكرة التدوينة اتنشرت هنا: البوابة اونلاين : يوم التدوين ضد العسكر

^__^