المصري

أنا شاب مصري ، بحب مصر و بحب كل حاجة فيها ، بحب الحرية (اللي للأسف مبقتش موجودة في مصر باي شكل من الأشكال ). قررت أعمل البلوج ده عشان أتنفس فيه و أعبر عن رأيي بكل صراحة و كل وضوح ، أنا ماحطيطش إسمي في أي مكان فيلبلوج ده ، مش خوف من حكومة ولا أمن الدولة (أي مخبر حبوب في أمن الدولة عايز معلومات عني يبعتلي ميل بس و أكيييد هبعتلو كل حاجة لحد رقم البطاقة ) ... المهم السبب الحقيقي إني عايز البلوج ده يبقى بتاع شباب مصر ، ،عايز شخصية مصري تبقى فكرة مش مربوطة بشخص معين ، متأثر شوية بفيلم  بس معلش بقى ماهو إلي إحنا فيه ده يخلي أي واحد عايز يلبس ماسك و ينزل يولع في أقرب مسئول فلحزب الواطي الديمقراطي  .. و مع أول بوست ليا فلبلوج عايز أشكر الحكومة المصرية  ... عشان الحمدلله خلت عندي حالة إنعدام ثقة غريبة ... أصلي كنت  أفتح التلفزيون ألاقي ناس منافقين عمالين يقول عاش الرئيس والإنجازات والديمقراطية والعدالة ...أقفل و أفتح أي جرنان إذا كان أخبار ولا أهرام ولا جمهورية نفس الكلام المنيل عشان الرئيس والإنجازات والديمقراطية والعدالة و بعدين أنزل الشارع ألاقي أطفال بتاكل من صناديق الزبالة و رجالة و ستات سارحين بروشيتات مضروبه و عمالين يقول ليلرايح ويليجاي أنا عندي سرطان و سكر و ضغط و قلب و بجري على يتامى و مش لاقي حق العلاج... أقول لنفسي أمال فين الإنجازات إلي قارفيني بها كل يوم و مفيش إجابة ... قلت أبطل أتفرج على الناس ده و أغير ، بدأت أتفرج على الناس إلي أمثال منى الشاذلي و محمود سعد و تفاءلت شوية بهم لاكتشف بعد فترة إنهم منافقين برضو بس منافقين أذكي شوية عن ممتاز القط مثلن بتاع "و تعلو مصر" و سرايا ملك "فن" الفوتوشوب.

دورت و الحمدلله لقيت ناس كتير زيي .. أصلي مبقتش أثق في أي حد مهما كان رأيه إلى إذا بدء كلامه بكلام زي حكومة زبالة أو الحمار إلي ماسك البلد ... أو ناس معارضين محترمين أمثال بلال فضل و نوارة نجم و علاء الأسواني و عمنا الكبير إبراهيم عيسى على سبيل المثال و غيرهم كتير ... و بعد فترة حسيت إن الغشاوة إلي حاطهالي جرنان الأهرام و برنامج البت بيتك على عنيا بدأت تختفي و بدأت أشوف الحقيقة أوضح ... إن جت للحق أنا عمري ما وثقت في حكومة مبارك ولا في كلاب السكك إلي حواليه و خاصتا أمثال أحمد عز (سبحان الله أكتر واحد كرهته في حياتي ، حتى إني مكنتش عارف إني ممكن أكره حد بالشكل ده) بدأت أستوعب إني إنسان ليا حقوق و مطالب و من حقي أغضب و أثور و أكلم و أقول رأيي من غير ما حد يقولي تلت التلاتة كام (واحد) بعدها علطول بدأت أفكر طب ولي أنا سمعته ده قوله و بسمعه طول حياتي ؟؟ كله كدب؟؟ طب أصدق إيه؟؟؟
و أنا دلوقتي مش عارف أصدق إيه ... بقيت بفكر بطريقة نظيرة المؤامرة علطول و دايما  دماغي شغالة و بفكر طب ماهو أصل لو كان صدهم بالخبر ده كذا يبقى كذا ... يا نهار اسود  ... طب لا لو كان كذا يبقى كذا ... يا نهار أسود منو .. لحد ما قربت أفقد الأمل فلعيشه  ولي عيشينها .. ياه البوست طول أوي مني ، مكنتش أعرف إن جوايا الكلام ده كله ، المهم عشان مطولش عليكوا أكتر من كدة أنا عايز حد يقولي أثق في مين ، يفهمني أصدق إيه و إيه لا ؟

أه صحيح ... أخر حاجة ، أنا نازل إنشاءالله يوم ٢٥ يناير الشارع و هعلي صوتي و هسرخ و هزعق و حقول  بعلو صوتي إني مصري ابن مصري و أفتخر  و أطالب مع المصريين كلهم بإقالة حبيب العادلي و حل المجلس و فض الحزب الواطي ومع إختلاف واحد إني مش عايز رحيل مبارك ... أنا عايز أشوفه و هو بيتحاسيب على كل حاجة حصلت في ألبلد  فيلتالاتين سنة إلي فاتو ...